Qanunvericiliyə uyğun olaraq, Səhiyyə Nazirliyi Analitik Ekspertiza Mərkəzi 01 yanvar 2024-cü il tarixindən etibarən mərhələli olaraq “Dərman Vasitələrinin Təqib və İzləmə Sistemi”-nin (DVTİS) tətbiq olunmasını təmin edir və nəzarəti həyata keçirir. Mütəmadi olaraq verdiyimiz məlumatlarda da qeyd edildiyi kimi, ilkin mərhələdə psixotrop və güclü təsir edən dərman vasitələrinin dövriyyəsinə Daxili İşlər Nazirliyi tərəfindən verilmiş xüsusi icazəyə malik tibb və əczaçılıq müəssisələrində həmin qrup dərman vasitələrinin sistem vasitəsilə izlənilməsi həyata keçirilir.
Növbəti mərhələ olaraq, müəyyən edilmiş altı dərman vasitəsinin izlənilməsinin başlaması səbəbilə, həmçinin sistemdən istifadəni mümkün qədər asanlaşdırmaq və optimallaşdırmaq məqsədilə, Səhiyyə Nazirliyi Analitik Ekspertiza Mərkəzinin Dərman vasitələrinin təqib və izləmə şöbəsinin əməkdaşları tərəfindən Mərkəzin akt zalında 10 idxalçı şirkətin nümayəndəsi üçün maarifləndirmə xarakterli görüş təşkil olunub.
Görüşdə izlənilməsi nəzərdə tutulmuş dərman vasitələri, DataMatrix kodun mahiyyəti, sistemin iştirakçıları, idxal bildirişi zamanı hansı məlumatların daxil edilməsi, aptekin satış bildirişi və bu kimi digər vacib məqamlar haqqında məlumat verilib. Təqdim olunan məlumatın daha da yadda qalması üçün nəzəri biliklər təqdim olunduqdan sonra, tədbir əməkdaşlar tərəfindən interaktiv olaraq davam etdirilib.
Görüşün sonunda şirkət nümayəndələri tərəfindən çətinlik yaradan məqamlara dair suallar ünvanlanıb və AEM əməkdaşları tərəfindən bu suallar cavablandırılıb.
