TƏVEKNL haqqında

Azərbaycan Respublikasında fəaliyyət göstərən Səhiyyə Nazirliyi “Analitik Ekspertiza Mərkəzi” publik hüquqi şəxsinin Tibb və əczaçılıq vasitələrinin ekspertizası və keyfiyyətinə nəzarət laboratoriyası (TƏVEKNL) ölkəyə idxal olunan və dərman vasitələrinin Reyestrində qeydiyyat proseduru üçün müraciət olunan dərman vasitələrinin keyfiyyətinə nəzarəti təmin etmək və əhalinin sağlamlığının qorunması məqsədilə yaradılmışdır. Mərkəzin Laboratoriyası həmçinin, vətəndaşlar və hüquqi şəxslər tərəfindən AEM-nə ünvanlanan müraciətlər əsasında keyfiyyəti şübhə doğuran dərman vasitələrinin keyfiyyətinin yoxlanılmasını həyata keçirir. Həmçinin, bioloji fəallığa malik qida əlavələrinin tərkiblərinin araşdırılaraq, dərman vasitəsi olub-olmaması istiqamətində ekspertizasını yerinə yetirir.
Bundan başqa, Mərkəzin Laboratoriyası 2019-cü ildə İSO 17025 “Sınaq və kalibrləmə laboratoriyasının səlahiyyətlərinə ümumi tələblər” standartına uyğun akkreditasiya olunmuş və İSO/İEC 17025 akkreditasiya sertifikatı aldıqdan sonra Beynəlxalq təşkilat kimi fəaliyyət göstərən Qlobal Fondun akkreditasiya olunmuş laboratoriyalar siyahısına daxil edilmişdir. Mərkəzin laboratoriyası 2014-cü ildən “European Directorate for the Quality of Medicines & HealthCare (EDQM)” tərəfindən EDQM tərəfindən “ISO/IEC 17043:2010 Uyğunluğun Qiymətləndirilməsi – peşəkarlığın yoxlanılması testinə dair ümumi tələblər”ə əsasən təşkil edilən Peşəkarlığın Yoxlanılması Testləri Layihəsində (PYT) – Proficiency Testing Scheme (PTS) yarışmalarda iştirak edir.  PYT-lərin əsas məqsədi iştirakçı laboratoriyalar tərəfindən həyata keçirilən analizlərin düzgünlüyü və etibarlılığının müqayisəli şəkildə yoxlanması və laboratoriyaların fəaliyyətinin obyektiv dəyərləndirilməsidir. Bu səbəbdən hər il EDQM tərəfindən müxtəlif fiziki-kimyəvi analiz üsullarına dair PYT-lər həyata keçirilir. Mərkəzin Laboratoriyası PYT layihəsi çərçivəsində müxtəlif mövzularda yarışmalara qoşulur və təqdirəlayiq nəticələr əldə edir.
Tibb və əczaçılıq vasitələrinin ekspertizası və keyfiyyətinə nəzarət laboratoriyasının mütəxəssisləri bir çox beynəlxalq təlim və kurslarda iştirak etmiş və müvafiq sertifikatlara layiq görülmüşlər. 2021-ci ildən TƏVEKNL ÜST-ün Bioloji Dərman Vasitələrinin Yoxlanılması Milli Laboratoriyalar şəbəkəsinə assosiativ üzv kimi qəbul edilmiş və “COVİD-19” pandemiyası ilə əlaqədar dünyada və ölkədə yaranmış vəziyyət dövründə öz imkanları daxilində fasiləsiz xidmət göstərmişdir.  Laboratoriyada həyata keçirilən tədqiqatların həqiqətən tam dəqiqliklə yerinə yetirilməsi üçün yüksək kimyəvi saflığa malik reagentlərdən, həssas və dəqiq avadanlıqlardan istifadə olunur. Mərkəzin laboratoriyasında müasir fiziki-kimyəvi tədqiqat üsullarından maye və qaz xromatoqrafiyası, ultrabənövşəyi və infraqırmızı spektrofotometriya, mikrobioloji tədqiqatlardan endotoksinlərin təyini – LAL-test, mikrobioloji təmizlik və sterillik təyini kimi sınaq üsullarından istifadə edilir. Laboratoriyada istifadə edilən avadanlıq, ləvazimat və cihazlar mütəmadi olaraq kalibrasiya və kvalifikasiya edilir. AEM-nin mütəmadi olaraq təkmilləşdirmə siyasətinə əsasən TƏVEKNL-nın xidmət çeşidləri və funksionallığı daim genişləndirilir və inkişaf etdirilir.
Həmçinin, Azərbaycan Tibb Universitetinin tələbələri üçün Mərkəzin Tibb və əczaçılıq vasitələrinin ekspertizası və keyfiyyətinə nəzarət laboratoriyasında istehsalat təcrübəsi keçirilir, magistr, doktorant və müəllimləri üçün isə elmi işlərin və məqalələrin təcrübi hissəsinin yerinə yetirilməsində təcrübi baza kimi istifadə edilir.