Cənubi Koreyanın Səhiyyə və Sosial Müdafiə Nazirliyi və Beynəlxalq Peyvənd İnstitutunun təşkilatçılığı, Koreyanın Azərbaycandakı səfirliyinin dəstəyi ilə, dekabr ayında Seulda 3 həftəlik “Global Training Hub for Biomanfacturing GTH-B”, “İntroductory Course for standart Practice (GxP)” təlimi baş tutub. 45 ölkədən 144 nümayəndənin iştirak etdiyi təlimdə, Afrika, MDB, Cənub-Şərqi Asiya və Cənubi Amerika ölkələrinin nümayəndələri iştirak edib. Respublikamızı Səhiyyə Nazirliyi Analitik Ekspertiza Mərkəzinin əməkdaşı Natəvan Paşayeva təmsil edib.
Təlim zamanı əczaçılıq sahəsinin bir çox vacib mövzuları üzrə mühazirələr oxunub. Təlimlər beynəlxalq sertifikatlı ekspertlər tərəfindən aparılıb. Hər təqdim olunan mövzu üzrə suallar verilərək “Interactive Activity” keçirilib və qrup tapşırıqları ilə davam edib.
Həmçinin təlim iştirakçıları üçün müəssisələrə ekskursiyalar təşkil olunub, xüsusən təlim iştirakçılarının “GC Biofarma” (vaksinlər və rekombinant protein preparatları istehsal edir), “Boditech Med” (kitlər və tibbi sınaq cihazları istehsal edir) müəssisələrinə əyani təcrübə üçün aparılmasının böyük praktik əhəmiyyəti olub. Bundan əlavə Koreyanın “Beynəlxalq Peyvənd İnstitutuna” (“İnternational Vaccine İnstitute”) ekskursiya təşkil edilib və bir sıra aktual mövzularda təqdimatlar nümayiş olunub.
Təlim müddətində biotexnoloji preparatların istehsalı ilə məşğul olan bir neçə böyük şirkətin nümayəndələrinin təqdimatlarla çıxışları iştirakçıların peşəkar fəaliyyəti üçün məhsuldar olub. Təlimin sonunda iştirakçılar sertifikatlarla təltif olunub.
