14 mart 2025-ci il tarixində Azərbaycan Respublikası Səhiyyə Nazirliyi “Analitik Ekspertiza Mərkəzi” publik hüquqi şəxsində özəl müalicə-profilaktika müəssisələrinin nümayəndələri üçün “Özəl müalicə-profilaktika müəssisələrində farmakonəzarətin təşkili və idarə edilməsi. Əlavə təsir” mövzusunda növbəti təlim keçirilib.
Təlimi giriş sözü ilə Analitik Ekspertiza Mərkəzinin Farmakonəzarət şöbəsinin müdiri Fərid Həsənov açıq elan etdikdən sonra Farmakonəzarət şöbəsinin mütəxəssisi Gilə İbrahimli təqdimatla çıxış edərək, “Farmakonəzarət və onun əhəmiyyəti. Səhiyyə sistemində məqsədi və rolu”, “Farmakonəzarət üzrə beynəlxalq standartlar, qanunvericilik aktları və qaydaları”, “Farmakonəzarət üzrə məsul şəxs və ona qoyulan tələblər”, “İstehsalçıların, distributorların və səhiyyə işçilərinin məsuliyyətləri və dərman vasitələrinin istifadəsi zamanı yaranan əlavə təsirlər haqqında bildirişlərin Mərkəzə təqdim edilməsi”, “Bildiriş formasının doldurulması qaydaları, hesabatın təqdim edilmə tələbləri və təqdim edilməsi müddətləri” və s. bu kimi vacib mövzular haqqında məlumat verib.
Təqdimat zamanı onlayn olaraq əlavə təsir haqqında məlumatın göndərilmə yolu ilə bərabər, eyni zamanda Farmakonəzarət şöbəsinin mütəxəssisi Vüsalə Xəlilli tərəfindən iştirakçılara bildiriş kartları təqdim edilərək, onların tərtib olunması əyani çalışma üzərindən göstərilib.
Təlimdə ümumilikdə 29 özəl müalicə-profilaktika müəssisəsindən 31 nümayəndə iştirak edib. Təlim zamanı iştirakçıların sualları cavablandırılıb və təcrübədən irəli gələn real nümunələrin təhlili də daxil olmaqla əhatəli izah edilib.
Yekunda mövzuya aid mürəkkəb və ya mübahisəli məsələlərə aydınlıq gətirilərək, müzakirələr aparıldıqdan sonra iştirakçılara sertifikatlar təqdim olunub.
