Beynəlxalq Mülki Müdafiə Təşkilatı ( BMMT ) Baş Məclisinin qərarı ilə 1972-ci ildən etibarən hər il martın 1-i bu təşkilata üzv olan bütün ölkələrdə “Ümumdünya Mülki Müdafiə günü” kimi qeyd edilir.
Hazırda Beynəlxalq Mülki Müdafiə Təşkilatına dünyanın 100-dən artıq ölkəsi daxildir. Beynəlxalq MM Təşkilatının əhatə etdiyi ölkələrdə məqsəd, dinc əhalinin mühafizəsi sahəsində təcrübəni ümumiləşdirib yaymaq, Mülki Müdafiə üzrə kadrların hazırlanması və təkmilləşdirilməsi, həmçinin təbii fəlakətlər və iri qəzalar zamanı dövlətlərarası qarşılıqlı yardım təşkil etməkdir.
Beynəlxalq Mülki Müdafiə Təşkilatı bu illər ərzində dünyanın bir sıra böyük şəhərlərində beynəlxalq konfranslar, habelə Mülki Müdafiə texnikasının sərgilərini təşkil etmiş, Mülki Müdafiənin təşkili, Mülki Müdafiənin tibb xidməti mövzularında, habelə radioloji mühafizəyə dair bir sıra beynəlxalq seminarlar keçirmişdir.
Azərbaycan Respublikası 1993-cü ildə bu nüfuzlu humanitar təşkilatın üzvlüyünə qəbul edilmiş və onun keçirdiyi bütün tədbirlərdə fəal iştirak edir. Əhalinin və ərazinin mühafizəsinin hüquqi cəhətdən təmin olunması məqsədilə ümummilli lidеr Heydər Əliyev 30 dekabr 1997-ci il tarixində “Mülki müdafiə haqqında” Azərbaycan Respublikası Qanununu təsdiq edib. Ulu öndərin qanunun qüvvəyə minməsi bаrədə 1998-ci il 18 aprel tarixli Fərmanı imzalaması isə Azərbaycanda bu günün önəmini əks etdirir.
Səhiyyə Nazirliyi Analitik Ekspetiza Mərkəzində də hər il olduğu kimi bu gün – 1 mart Mülki Müdafiə günü olaraq qeyd edilib. Tədbiri giriş sözü ilə Analitik Ekspertiza Mərkəzinin baş direktoru Murad Süleymanov açıb. Daha sonra baş direktorun müavini Rafiq Xudayev məruzə edərək mövzu ilə əlaqədar ümumi məlumat verib. Həmçinin bu istiqamətlərdə görülən işlərin hesabatı da dinlənilib.
