Asiya İnkişaf Bankının dəstəyi ilə Mərkəzi Asiya Regional İqtisadi Əməkdaşlıq Proqramı (CAREC) çərçivəsində Qazaxıstanın Almatı şəhərində, proqrama üzv ölkələrin səhiyyə sahəsi üzrə işçi qrupunun 5-ci görüşü keçirilib. Tədbirdə Səhiyyə Nazirliyinin Analitik Ekspertiza Mərkəzinin Tibb və əczaçılıq vasitələrinin keyfiyyətinin yoxlanması və ekspertizası laboratoriyasının müdiri Çingiz Şükürov də iştirak edib.
İki gün davam edən tədbirdə CAREC-2030 Səhiyyə Strategiyası əsasında CAREC ölkələrinin təqdimatları dinlənilib, kadr potensialının hazırlanması və gücləndirilməsi, epidemioloji və laboratoriya nəzarətinin, pandemiya və iqlim dəyişikliklərinə hazırlıq məsələləri, səhiyyənin rəqəmsallaşdırılması üzrə müzakirələr aparılıb. Həmçinin, əczaçılıq sahəsi üzrə dərman vasitələrinin idxalından asılılıq, idxal zamanı keyfiyyətin yoxlamasında risk yanaşması, üzv ölkələr arasında vahid platformanın tətbiqi və digər mühüm məsələlər də müzakirələrdə öz əksini tapıb.
Görüşün nəticəsi olaraq iştirakçılara sertifikatlar təqdim edilib.
