Azərbaycan Respublikası qanunvericiliyinə əsasən dərman vasitələrinin, maddələrinin, tibb vasitələrinin dövlət qeydiyyatı üçün 150 manat; dərman vasitələrinin, maddələrinin, tibb vasitələrinin yenidən dövlət qeydiyyatı üçün 100 manat; dərman vasitələrinin, maddələrinin, tibb vasitələrinin qeydiyyat sənədlərində dəyişikliklərin dövlət qeydiyyatı üçün 50 manat məbləğində dövlət rüsumu ödənilir.
Qanunvericilikdə edilən dəyişikliklərə əsasən “Dövlət rüsumlarının elektron idarəedilməsi (e-rüsum)” informasiya sistemi qurulmuşdur. Ödənişlər “Dövlət rüsumlarının elektron idarəedilməsi (e-rüsum)” informasiya sistemi vasitəsilə formalaşdırılan “e-bildiriş” əsasında ödənilməlidir. (e-rusum.maliyye.gov.az)
“Dövlət rüsumlarının elektron idarəedilməsi (e-rüsum)” informasiya sisteminin istifadəyə verilməsi ilə əlaqədar olaraq dövlət rüsumlarının Ərizəçilər tərəfindən köhnə qaydada rekvizitlər əsasında dövlət büdcəsinə ödənilməsi yol verilməzdir və yuxarıda qeyd edilən ödənişlərin icra edilməsi “e-bildiriş” əsasında həyata keçirilməlidir.
Bunun üçün ərizəçilər tərəfindən tam və dəqiq doldurulmuş Məlumat forması Mərkəzə təqdim edilir. Həmin Məlumat formasına əsasən “e-bildiriş” yaradılır.
Portalda (e-rusum.maliyye.gov.az) Mərkəz tərəfindən yaradılmış “e-bildiriş” Ərizəçilərə onların müraciəti əsasında elektron və ya kağız daşıyıcıda təqdim edilir.
Ərizəçilər İnternet Banking vasitəsilə “Hökumət Ödənişləri” hissəsində “Dövlət rüsumlarının elektron idarə edilməsi (e-rüsum) informasiya sistemi”ndə Ödənişin növü hissəsində “Sənəd nömrəsi” xanasında “e-bildiriş”in seriya və nömrəsini qeyd etməklə ödənişi həyata keçirir. Ərizəçi ödənişi həyata keçirməsi ilə bağlı ödəniş qəbzini Mərkəzə təqdim etməlidir.
Ərizəçi dövlət rüsumunu bank vasitəsilə ödəniş tapşırığı təqdim etməklə köçürdükdə, ödəniş tapşırığında “Bu ödəniş “Hökumət Ödəniş Portalı”nda “Dövlət rüsumlarının elektron idarə edilməsi (e-rüsum) informasiya sistemi”ndə Ödənişin növü hissəsində “Sənəd nömrəsi” xanasında “e-bildiriş”in seriya və nömrəsinə əsasən ödənilməlidir.” qeydini etməlidir.
Dövlət rüsumu ödənilməmişdən əvvəl ərizəçi tərəfindən xidmətin və ya hüquqi hərəkətin göstərilməsindən imtina edildikdə bu barədə Mərkəzi yazılı qaydada məlumatlandırmalıdır.
