Fevralın 7-də Bakıda Səhiyyə Nazirliyi İctimai Səhiyyə və İslahatlar Mərkəzinin təşkilatçılığı ilə “Pasiyent təhlükəsizliyi: Qlobal fəaliyyət planı və milli prioritetlər” mövzusunda konfrans keçirildi. Konfransda səhiyyə sahəsinin bir sıra qurumlarının və ÜST-ün nümayəndələri iştirak edib. Tədbir ilk növbədə Türkiyədə baş vermiş dəhşətli zəlzələ nəticəsində həyatını itirənlərin xatirəsinin yad edilməsi ilə başlayıb.
Konfransı giriş sözü ilə açan İSİM-in direktoru Qəhrəman Haqverdiyev bildirib ki, hər il tibbi yardım göstərilməsi zamanı təhlükəsizlik qaydalarına əməl olunmaması səbəbindən dünyada milyonlarla pasiyent zərər görür və məhz bu səbəbdən Ümumdünya Səhiyyə Təşkilatı (ÜST) bütün ölkələri və dünyadakı tərəfdaşlarını bu sahədə təxirəsalınmaz tədbirlər görməyə çağırır: “Pasiyentlərin təhlükəsizliyi və onlara keyfiyyətli tibbi yardım göstərilməsi – səhiyyə xidmətləri sistemində səmərəliliyi artırmağın ən mühüm şərtidir”.
Qeyd edək ki, 2019-cu ilin may ayında Dünya Səhiyyə Assambleyasının (DSA) 72-ci sessiyasında Dünya Pasiyent Təhlükəsizliyi Günü təsis edilib. Bundan əlavə, üzv dövlətlər və özəl sektorlar da daxil olmaqla bütün müvafiq tərəfdaşlarla məsləhətləşmələr əsasında 2021-2030-cu illəri əhatə edən və 7 əsas strateji hədəfi özündə birləşdirən “Pasiyent təhlükəsizliyi üzrə Qlobal Fəaliyyət Planı” tərtib edilmiş və DSA-nın 2021-ci ildə keçirilmiş 74-cü iclasında qəbul olunmuşdur.
Konfransda çıxış edən Səhiyyə Nazirliyinin Analitik Ekspertiza Mərkəzinin Farmakonəzarət şöbəsinin müdiri Fərid Həsənov bildirib ki, ölkəmizdə pasiyent təhlükəsizliyini təmin etmək məqsədilə qeydiyyatdan keçmiş dərman vasitələri idxaldan öncə mərkəz tərəfindən yoxlanılır. Fərid Həsənov həmçinin qeyd edib ki, dərman vasitələrinin təhlükəsiz istifadəsinin təmin edilməsi məqsədilə əlavə təsirləri və fayda-risk nisbətləri sistemli bir şəkildə izlənilir. Bunun üçün lazımi məlumat toplanılır, qeydiyyata alınır, qiymətləndirilir, arxivləşdirilir. Daha sonra dərmanların səbəb ola biləcəyi zərərlərin minimallaşdırılması üçün zəruri tədbirlər görülür.
Tədbirin sonunda iştrakçıları maraqlandıran suallar cavablandırılıb, geniş fikir mübadiləsi aparılıb, bu istiqamətdə İSİM-də təşkil olunan tədbirlərin əhəmiyyəti və gələcəkdə davam etdirilməsinin vacibliyi vurğulanıb.
