Azərbaycan Respublikası Səhiyyə Nazirliyi Analitik Ekspertiza Mərkəzində 18 dekabr 2024-cü il tarixində özəl müalicə-profilaktika müəssisələrinin nümayəndələri üçün “Özəl müalicə-profilaktika müəssisələrində farmakonəzarətin təşkili və idarə edilməsi” mövzusunda təlim keçirilib. Təlimi giriş sözü ilə Analitik Ekspertiza Mərkəzinin Farmakonəzarət şöbəsinin müdiri Fərid Həsənov açıq elan edib. Təlim zamanı Mərkəzin Farmakonəzarət şöbəsinin baş mütəxəssisi Fidan Kamranlı qeyd olunan mövzu ilə bağlı hazırladığı təqdimatla çıxış edərək, aşağıdakı aspektləri iştirakçıların nəzərinə çatdırıb:
- Farmakonəzarət və onun əhəmiyyəti. Səhiyyə sistemində məqsədi və rolu
- Farmakonəzarət üzrə beynəlxalq standartlar, qanunvericilik aktları və qaydaları
- Farmakonəzarət üzrə məsul şəxs və ona qoyulan tələblər. İstehsalçıların, distributorların və səhiyyə işçilərinin məsuliyyətləri və dərman vasitələrinin istifadəsi zamanı yaranan əlavə təsirlər haqqında bildirişlərin Mərkəzə təqdim edilməsi
- Tibb və əczaçılıq işçilərinə farmakonəzarət qaydaları, yaranan əlavə təsirlərin qiymətləndirilməsi meyarlarının müəyyən edilməsi
- Farmakonəzarət üzrə təlimin tibb müəssisələrində müntəzəm olaraq keçirilməsinin əhəmiyyəti
- Bildiriş formasının doldurulması qaydaları, hesabatın təqdim edilmə tələbləri və təqdim edilmə müddəti
- Əlavə təsir haqqında məlumatın onlayn göndərilməsinin əyani olaraq iştirakçılara nümayişi
Ümumilikdə, təlimdə 19 özəl müalicə-profilaktika müəssisədən 22 nümayəndə iştirak edib. Təlim iştirakçılarının sualları cavablandırılıb və təcrübədən irəli gələn real nümunələrin təhlili də daxil olmaqla iştirakçılara əhatəli izahı təqdim edilib. Təlim mürəkkəb və ya mübahisəli məsələlərə aydınlıq gətirilən müzakirələrlə yekunlaşdırılıb.
