2023-cü ilin iyun ayında Türkiyənin İstanbul şəhərində fövqəladə hallar zamanı, ictimai səhiyyə sahəsində xüsusilə peyvəndlər nəzərə alınmaqla, tibbi məhsulların qeydiyyat vəsiqələrinin verilməsi üçün tənzimləmə hazırlığı üzrə ÜST-ün Subregional Simulyasiya Seminarı (WHO Simulation Workshop on Regulatory Preparedness for provision of marketing authorization of medical products with focus on vaccines, in public health emergencies) təşkil olunmuşdur. Seminarda AEM-in Dərman vasitələrinin qeydiyyat-ekspertiza şöbəsinin mütəxəssisi Rufana Usubova respublikamızı təmsil etmişdir. Sözügedən Simulyasiya Seminarı ÜST-ün strategiya və təlimatlarına əsaslanaraq pandemiyalara və ictimai səhiyyədə digər fövqəladə hallara daha yaxşı hazır olması üçün ölkənin dərman (peyvənd) tənzimləmə potensialını gücləndirmək məqsədi daşıyır.
ÜST-ün təlimçiləri tərəfindən “Tənzimləmə hazırlığı daxil olmaqla, tənzimləmənin gücləndirilməsi proqramının nəzərdən keçirilməsi, qlobal perspektivlik, GBT haqqında məlumat”, “Pandemiya zamanı idxal olunan zəruri tibb məhsullarına əlçatanlığın və yerləşdirmənin planlaşdırılması”, “ÜST-ün Akademiyasının yeni hibrid proqramı haqqında məlumat” başlıqlı mövzularda təqdimatlar nümayiş olunmuşdur.
Həmçinin, seminar iştirakçıları COVID-19 pandemiyası təcrübəsi və əldə olunmuş nəticələr üzrə ölkə təqdimatları ilə məruzələr etmişdir. Bu xüsusda, Dərman vasitələrinin qeydiyyat-ekspertiza şöbəsinin mütəxəssisi Rufana Usubova ölkəmizin bu sahədə təcrübəsi haqqında təqdimatla çıxış edərək məlumat vermişdir. Pandemiya peyvəndləri üçün hazırkı milli tənzimləmə hazırlığı ilə bağlı müzakirələr aparılmışdır.
Tədbirin ikinci günündə, “Pandemiyaya hazırlıq və cavab simulyasiyası: hərkəsi bir araya gətirmək” adlı Simulyasiya Seminarı qrup oyunu şəklində keçirilmişdir. Qrup müzakirəsi, yol xəritəsinin hazırlanması və yol xəritəsinin proyektinin təqdimatı, ÜST-ün dəstəyi üçün əlavə potensial sahələr də daxil olmaqla, hazırlanmış yol xəritəsinin icrasına dair dəyirmi masa müzakirəsi keçirilmişdir.
Seminarda 11 ölkənin (Azərbaycan, Türkiyə, Serbiya, Qazaxıstan, Moldova, Gürcüstan, Türkmənistan, Özbəkistan, Tacikistan, Qırğızıstan və Ermənistan) aidiyyəti qurumlarının nümayəndələri iştirak etmişdir.
Seminarın sonunda iştirakçılar sertifikat ilə təltif olunmuşdur.
