“The Wall Street Journal” bir neçə milyon dollara başa gələ biləcək super bahalı dərmanların yeni dövrünün başlanğıcı xəbərini verib.
Söhbət irsi xəstəliklərin müalicəsində istifadə olunan dərmanlardan gedir. 2022-ci ilin avqust ayından etibarən ABŞ və Avropanın tənzimləyici qurumları nadir irsi xəstəliklərin müalicəsi üçün nəzərdə tutulmuş dörd yeni dərmanın istifadəsini təsdiqləyiblər. Bu dərmanlar xəstəliyi bir kursda yüngülləşdirir, lakin onun dəyəri milyonlarla dollardır.
Xüsusilə, “CSL” şirkətinin, hemofiliya B ilə mübarizə üçün nəzərdə tutulmuş Hemgenix dərmanının qiyməti 3.5 mln dollardır ki, bu da rekord həddir. Uşaqlarda nadir nevroloji xəstəliyin müalicəsi üçün “Bluebird” şirkətinin Skysona preparatı 3 mln dollar dəyərində qiymətləndirilir. İrsi qan xəstəliyindən müalicə üçün, eləcə də əzələ zəifləməsinin müalicəsində istifadə olunan dərmanlar yüksək məbləğə başa gələcək.
Bu dərmanların yaradıcıları qeyd edirlər ki, yüksək qiymətə səbəb, nadir bir xəstəliyi müalicə etmək üçün bir doza kifayət etməsidir. Bu zaman xəstə ya tam sağalır, ya da uzun illər xəstəliyini unuda bilir. Bundan əlavə, uzunmüddətli perspektivdə belə terapiya nəzəri cəhətdən hətta pula qənaət edə bilər, çünki bu, xəstələri həyatları boyu köhnəlmiş müalicə üsullarından istifadə etmək məcburiyyətindən xilas edəcəkdir. Bununla belə, səhiyyə sahəsində sığorta şirkətləri belə böyük ödənişlər üçün hazır olmadıqlarını bildirirlər. Onlar bu yanaşmanın faydalarına baxmayaraq, birdəfəlik müalicə üçün böyük məbləğ ödəməkdənsə, uzun müddət ərzində müntəzəm olaraq köhnə protokollar üzrə müalicələr üçün ödəniş etməyi üstün tuturlar.
