Hər il Ümumdünya Səhiyyə Təşkilatının Uppsala Dərman monitorinq mərkəzinin təşkil etdiyi dərman vasitələrinin istifadəsi zamanı yaranan əlavə təsirlər haqqında bildirişlərin pasiyentlər və tibb işçiləri tərəfindən bildirilməsi üçün təşviq işləri aparılır. Təşviqat kampaniyası “MedSafetyWeek” adı ilə tanınır və Milli farmakonəzarət mərkəzinə (AEM) bildirişlərin təqdim olunması məqsədilə təşviq işlərinin aparılması üçün təşkil olunur.
Səhiyyə Nazirliyi Analitik Ekspertiza Mərkəzi bu il 6-12 noyabr müddətində planlaşdırılan dərmanların əlavə təsirləri barədə məlumat vermənin vacibliyi haqqında məlumatlılığı artırmaq üçün 80-dən çox dərman vasitələrinə nəzarət edən qurum və bir neçə qeyri-hökumət təşkilatının iştirak etdiyi qlobal #MedSafetyWeek kampaniyasında iştirak edir. “Kim məlumat verə bilər?” mövzusu ilə bu ilki kampaniya əlavə təsirlər barədə məlumat verən və dərmanların təhlükəsiz istifadəsində iştirakı olan hər bir xəstənin, həkimin, tibb bacısının və əczaçının əsas roluna yönəldiləcək.
Bütün dərman vasitələri bəzi pasiyentlərdə əlavə təsirlərə səbəb ola bilər. Buna görə də, bazara çıxarıldıqdan sonra onların təhlükəsizliyinə davamlı olaraq nəzarət olunmalıdır. Təhlükəsizliyə nəzarətin məqsədi məlum əlavə təsirlər haqqında daha çox məlumat əldə etmək və yeni əlavə təsirləri aşkar etməkdir. Tənzimləyici qurumlar bu əlavə təsirləri aşkar və təhlil etmək, eləcə də, gələcək pasiyentlərə zərərin qarşısını almaq üçün sistemlər tətbiq edir.
Əlavə təsirlər barədə AEM-ə məlumat verməklə, siz meydana çıxan təhlükəsizlik məsələlərinin müəyyən edilməsində fəal iştirak edirsiniz ki, qurum lazım olduqda tədbirlər görsün, bununla da sizi və başqalarını zərərdən qoruya bilsin. “Pasiyent, tibb işçisi, baxıcı və əczaçı tərəfindən verilən hər bir bildiriş kliniki istifadədə olan dərman vasitələrinin faydaları, risklərinə dair daha çox məlumat əldə etməkdə əsas rol oynayır. Riskləri minimuma endirmək üçün tədbirlər görməyə imkan verir.
Hər kəs əlavə təsirlər barədə AEM-ə məlumat verə bilər. Əlavə təsirlər haqqında bildirişləri müxtəlif yollarla təqdim edə bilərsiniz. MedSafetyWeek-də əlavə təsirləri bildiriş kartları vasitəsi ilə, eləcə də Mərkəzin rəsmi saytında yerləşdirilmiş linkdən keçid edib onlayn bildirərək dərman təhlükəsizliyinə dəstək olmaq hər birimizin borcudur.
