Asiya İnkişaf Bankının dəstəyi ilə 11-15 noyabr 2024-cü il tarixlərində Koreya Respublikasında baş tutan 2024-cü il Ümumdünya Bio Sammit çərçivəsində “Epidemiya və digər xəstəliklərin yayılmasına qarşı mübarizə üzrə Asiya Diaqnostika peyvəndləri və Terapevtik şəbəkəsi” (“ADVaNCE”) layihəsinin rəsmi başlanması münasibətilə seminar keçirilib.
Qazaxıstan, Özbəkistan, Monqolustan, Banqladeş, Vyetnam, Tayland, İndoneziya, Filippin və digər ölkələrin dərman vasitələrinin milli tənzimləyici orqanları, akademik və beynəlxalq təşkilatların (ÜST, GAVİ, PAHO və s.) nümayəndələrinin iştirak etdiyi Ümumdünya Bio Sammitində Azərbaycanı Səhiyyə Nazirliyinin Əczaçılıq və tibbi avadanlıqlar şöbəsinin müdiri Şahbala Yaqubov və Səhiyyə Nazirliyi Analitik Ekspertiza Mərkəzinin Dərman vasitələrinin qeydiyyatı-ekspertiza şöbəsinin müdir müavini Azər Həsənov təmsil ediblər.
Ümumdünya Bio Sammiti çərçivəsində “COVID-19 pandemiyasından öyrənilən təcrübə, problemlər və növbəti addımlar: peyvəndlərin, terapevtik və diaqnostik vasitələrinin istehsalı, müştərək satınalmaları və texnologiya transferinin dəstəklənməsi; ölkələr üçün normativ (tənzimləyici) dəstək (normativ potensialının gücləndirilməsi və uyğunlaşdırılması)” mövzusunda panel müzakirələr təşkil olunub.
Qrup seminarı zamanı iştirakçılar ilə müzakirələr aparılıb və suallar cavablandırılmışdır.
Tədbirin məqsədi “ADVaNCE” layihəsinin işə salınması və daha sonra Koreyadakı əsas bioistehsal mərkəzlərinə (Yonsei University, Korea Ministry of Food and Drug Safety (MFDS), Korea Vaccine Center for Assisting Safety and Technology (K-VCAST)) səfərlər etməklə, milli tənzimləyici orqanlar, istehsalçılar, akademik və beynəlxalq təşkilatlar arasında əməkdaşlığı inkişaf etdirmək, gələcək mümkün pandemiyalara hazırlığı və fəaliyyəti təkmilləşdirməkdir.
