Səhiyyə Nazirliyi Analitik Ekspertiza Mərkəzi tərəfindən “Dərman vasitələrinin Təqib və İzləmə Sistemi” üzrə növbəti təlimatlandırma Tibbi Ərazi Bölmələrini İdarəetmə Birliyinin (TƏBİB) tabeliyində olan müəssisələrin, eləcə də, İnnovasiya və Təchizat Mərkəzinin nümayəndələri üçün baş tutub.
Günün birinci yarısı Bakıda, ikinci yarısı isə regionlarda yerləşən dövlət tibb müəssisələrinin dərman vasitələrinin dövriyyəsinə nəzarət edən məsul şəxsləri üçün nəzərdə tutulan görüşlər təşkil olunub. Bakıda 58 və regionlardan yerləşən 55 müəssisədən ümumilikdə 113 nümayəndənin iştirak etdiyi tədbirdə “Dərman Vasitələrinin Təqib və İzləmə Sistemi”nin istifadə qaydası başlanğıcdan sonlandırmaya qədər bütün proses əyani olaraq nümayiş etdirilib, detallarla izah edilib, yaranan suallar cavablandırılıb. Həmçinin, “QR kod sifarişi”, “İstehsal bildirişi”, “İdxal bildirişi”, “Köçürülmə bildirişi”, “Aptekin satış bildirişi”, eləcə də, “Tibb müəssisəsinin istehlak bildirişi” altsistemlərinin istifadəsinə dair zəruri məlumatlar təqdim edilib.
