Müasir dünyada əczaçılıq sahəsi getdikcə qloballaşır və bu faktor beynəlxalq əməkdaşlığı daha da zəruri edir. Bu səbəbdən Analitik Ekspertiza Mərkəzinin rəhbərliyi tərəfindən, digər ölkələrin əczaçılıq sahəsinin tənzimləyici qurumları ilə əməkdaşlığının genişləndirilməsi daim diqqətdə saxlanılır. Artıq Qazaxıstan, Belorusiya, Ukrayna və Özbəkistanın əczaçılıq sahəsində requlyator qurumları ilə qarşılıqlı anlaşma və əməkdaşlıq haqqında Memorandum imzalanmış və əczaçılıq sahəsinin bir sıra istiqamətləri üzrə əməkdaşlıq dinamik olaraq inkişaf etdirilir.
Bu prosesin davamı olaraq, 27-28 may tarixlərində Özbəkistan Respublikasının Daşkənd şəhərində Amerika Farmakopeyasının və Özbəkistan Respublikası Səhiyyə Nazirliyinin təşkilatçılığı ilə baş tutan səfər çərçivəsində, Özbəkistan Respublikası Səhiyyə Nazirliyinin tabeliyində olan Əczaçılıq Məhsullarının Təhlükəsizliyi Mərkəzi və Azərbaycan Respublikası Səhiyyə Nazirliyi “Analitik Ekspertiza Mərkəzi” publik hüquqi şəxsi arasında qarşılıqlı anlaşma və əməkdaşlıq Memorandumu imzalanıb.
Memorandumda, dərman və tibb vasitələrinin ekspertizası, onların keyfiyyətinə nəzarətin təkmilləşdirilməsinə dair təcrübə mübadiləsi, dərman və tibb vasitələrinin qeydiyyatı və dövriyyəsi sahəsində beynəlxalq standartların tətbiq edilməsinə dair tövsiyələrin hazırlanmasında dəstək, dərman vasitələri ilə bağlı farmakonəzarətin həyata keçirilməsi, dərman və tibb vasitələrinin əlavə təsirlərinə monitorinqin keçirilməsi sahəsində məlumat mübadiləsi, elmi və praktik tədbirlərdə, konfrans, simpozium, seminar və forumlarda qarşılıqlı iştirak və s. istiqamətlərdə əməkdaşlıq və təcrübə mübadiləsinin təmin edilməsi öz əksini tapıb.
Ümidvarıq ki, iki qardaş ölkənin tənzimləyici qurumları arasında imzalanmış bu Memorandum bəhrəli olacaqdır.
