Avropa Dərman Agentliyinin təşkilatçığı ilə 27-28 noyabr 2025-ci tarixlərdə Niderland Krallığının, Amsterdam şəhərində “Aİ-ı Farmakonəzarət müfəttişləri işçi qrupu təlim kursu 2025” (2025 EU Pharmacovigilance Inspectors Working Group Training course) adlı hibrid formatda təlim təşkil olunmuşdur.
Təlimdə Səhiyyə Nazirliyinin Analitik Ekspertiza Mərkəzindən Farmakonəzarət şöbəsinin müdiri Fərid Həsənov yerində, şöbənin müdir müavini Xalisə Əkbərova və şöbənin eksperti Rəfiqə İbrahimova onlayn olaraq iştirak etmişdirlər. Təlim farmakonəzarət mərkəzləri və milli tənzimləyici agentliklərinin farmakonəzarət müfəttişləri üçün təşkil edilmişdir. Təlimdə Azərbaycandan, Türkiyədən, İngiltərədən, Braziliyadan, Tailanddan və Avropa İttifaqına daxil 27 ölkədən ümumilikdə 89 nümayəndə yerində və 150-dən çox nümayəndə onlayn olaraq iştirak edirdi.
İki gün ərzində “Siqnalların idarə olunması” – (ümumi prinsiplər), “Böyük və kiçik şirkətlər”- (kiçik şirkətlərin xüsusiyyətləri və onların yoxlanması, böyük şirkətlərin xüsusiyyətləri və onların yoxlanması, sual-cavab sessiyası) və “Avropanın Etibarlı Farmakonəzarət təcrübəsi üzrə təlimatın (GVP) Modul XVI – Risk minimallaşdırma tədbirləri – 3-cü yenilənmənin tətbiqi” – (modula ümumi baxış, müfəttişlər tərəfindən risk minimallaşdırma tədbirləri tətbiqi ilə bağlı Avropa İttifaqı və ya Farmakonəzarət üzrə Risklərin Qiymətləndirilməsi Komitəsi (the Pharmacovigilance Risk Assessment Committee – PRAC) səviyyəsində və milli səviyyədə nələrə baxılır, yoxlamalarda nələr müəyyən olunur) mövzularında təqdimatlar dinlənildi.
Həmçinin, tədbir zamanı böyük və kiçik şirkətlərin hadisə araşdırmaları üzrə müzakirələr və konsolidasiyası, “Farmakonəzarət sisteminin əsas dosyesi” sənədində müəyyən olunan çatışmamazlıqlar və gözləntilərin uyğunlaşdırılması, genişləndirilmiş EudraVigilance dərman və tibb vasitələri lüğəti (XEVMPD) üzərində müfəttişlər üçün təlim (giriş və nümunələr üzrə çalışma) mövzuları ətrafında müzakirələr aparıldı və praktiki işçi qrup təlimlərində iştirak baş tutdu.
