Cari ilin may ayında İsveçrənin Cenevrə şəhərində Ümumdünya Səhiyyə Təşkilatının təşəbbüsü ilə İnsan və baytarlıq dərmanlarının Tənzimləyici qurumların rəhbərlərinin iştirakı ilə “Antibiotiklərin reseptsiz satışının mərhələli şəkildə dayandırılması” mövzusuna həsr olunmuş I Qlobal Birgə Zirvə toplantısı keçirilmişdir. Sözügedən toplantıda Səhiyyə Nazirliyinin Analitik Ekspertiza Mərkəzinin baş direktoru Murad Süleymanov iştirak etmişdir.
Zirvə toplantısında dünya müstəvisində antibiotiklərə qarşı rezistentliyin tənzimlənməsinin vacibliyi vurğulanaraq, mövcud dərmanların istifadəsinin optimallaşdırılmasının müasir həllinə dair ABŞ, Böyük Britaniya, Argentina, Fransa və digər qabaqcıl ölkələrin bu istiqamətdə təcrübələrinə həsr edilmiş təqdimatlar nümayiş etdirilmişdir.
Bununla yanaşı, Murad Süleymanov və Mərkəzin Keyfiyyəti idarəetmə şöbəsinin müdiri Şamil Aydəmirov may ayında Əczaçılıq Təftişi üzrə Əməkdaşlıq Şəbəkəsinin (Pharmaceutical İnspection Co-operation Scheme (PİC/S)) dəvəti ilə Təşkilatın 52-ci toplantısında iştirak etmişlər. Toplantıda təşkilatın daimi üzvləri və daimi üzvlüyünə namizəd ölkələrin illik məruzələri dinlənilmiş, 2023-2027-ci illərə dair strateji Plandan irəli gələn məsələlər müzakirə edilmişdir.
Mərkəzin baş direktoru tərəfindən Analitik Ekspertiza Mərkəzinin fəaliyyəti, PİC/S-in daimi üzvlüyünə seçilməsi üçün həyata keçirilmiş tədbirlər və yaxın gələcəkdə görülməsi nəzərdə tutulan işlərə dair təşkilat rəhbərliyinə məlumat verilmişdir.
