Azərbaycan Respublikası Səhiyyə Nazirliyinin “Analitik Ekspertiza Mərkəzi” Publik hüquqi şəxsinin Farmakonəzarət şöbəsinin müdiri Fərid Həsənov 18-22 yanvar 2026-cı il tarixlərində İsrailin Tel-Əviv şəhərində keçirilən bu ölkənin aparıcı səhiyyə innovasiyaları tədbiri olan HealthIL Week 2026-da iştirak etmişdir.
Mərkəzi təmsil edən Fərid Həsənov 65-dən çox səhiyyə təşkilatını, 100-dən çox startapı və İsrail səhiyyə innovasiyalarının ən müasir inkişaf sistemləri ilə tanış olmaq üçün sənaye, hökumət və investisiya sektorlarının nümayəndələrini bir araya gətirən nüfuzlu tədbirə qatılmışdır.
Hər il olduğu kimi, “HealthIL Week” İsrailin milli səhiyyə innovasiyaları ekosistemi olan HealthIL və Startup Nation Centralın birgə əməkdaşlığı ilə təşkil olunur və səhiyyə sektorunda beynəlxalq əməkdaşlıq və bilik mübadiləsi üçün mühüm platforma kimi xidmət göstərir. Tədbir İsrail İqtisadiyyat Nazirliyi, İsrail Səhiyyə Nazirliyi, İsrail İnnovasiya Agentliyi və “Global Jewish Aid” təşkilatı tərəfindən dəstəklənmişdir.
Bu ilki tədbirdə dərman və tibbi vasitə, avadanlıq istehsalçıları, süni intellektin səhiyyə sistemlərinə inteqrasiyası ilə məşğul olan şirkətlər, startap şirkətləri və İsrailinin aparıcı xəstəxanaları: Teva, AWS, Oracle Health, AstraZeneca, AbbVie, Novartis, Bayer, Medtronic, Nvidia, KPMG, AION labs, Pitango, Matrix Medika, Chameleon, Philips, ALYN Hospital, Reuth Rehabilitation Hospital, Shaarel Tzedek Medical Center, Rambam Health Care və s. iştirak etdilər.
AEM-in nümayəndəsi İsrail səhiyyə innovasiyalarının növbəti mərhələsini araşdıran əsas konfrans sessiyalarında, sərgi və konfrans obyektlərində, səhiyyə təşkilatları və texnologiya təminatçıları ilə görüşlərdə, startap görüşlərində, eləcə də ekosistem liderləri və qərar qəbulediciləri ilə şəbəkə yaratma tədbirlərində iştirak etmişdir.
Tədbirdə iştirakla AEM qlobal səhiyyə innovasiyalarından xəbərdar olmaq və yeni beynəlxalq tərəfdaşlara çıxış əldə etmişdir. Tədbir iştirakçılarına səhiyyə texnologiyaları, innovativ biznes modelləri və səhiyyə xidmətlərinin göstərilməsi və idarə edilməsində ən yaxşı təcrübələr haqqında dəyərli məlumatlar təqdim olundu.
HealthIL Week 2026 səhiyyə innovasiyalarında qlobal liderlərlə əlaqə qurmaq və səhiyyə sisteminə fayda verə biləcək potensial əməkdaşlıqları araşdırmaq üçün müstəsna imkanlar təqdim edən tədbir hesab olunur.
