Lisenziyanın alınması
Lisenziya verən qurum
Hazırda özəl tibb fəaliyyəti üçün lisenziya Azərbaycan Respublikasının İqtisadiyyat Nazirliyi tərəfindən verilir.
Necə müraciət etməli?
Azərbaycan Respublikası Kiçik və Orta Biznesin İnkişafı Agentliyi tabeliyində olan KOB evləri, “Lisenziyalar və icazələr” portalı və “ASAN xidmət” mərkəzləri vasitəsilə İqtisadiyyat Nazirliyinə ərizələr ilə müraciət edilə bilər.
Lisenziyadan necə istifadə etməli?
Lisenziyanın sahibi lisenziyadan yalnız özü istifadə edə bilər və onu başqa şəxsə verə bilməz. Lisenziyanın qüvvəsi lisenziya sahibinin təsisçi (iştirakçı) olduğu hüquqi şəxslərə, habelə lisenziyanın sahibi ilə birgə fəaliyyət, o cümlədən onunla əməkdaşlıq barədə müqavilə əsasında fəaliyyət göstərən başqa şəxslərə şamil edilmir.
Əgər lisenziya tələb olunan fəaliyyətin həyata keçirilməsi obyektlə bağlıdırsa və sahibkara fəaliyyət ünvanına əsasən lisenziya verilmişdirsə, sahibkar həmin lisenziya ilə digər ünvanda fəaliyyət göstərə bilməz.
Özəl tibb fəaliyyəti sahəsində Səhiyyə Nazirliyinin rolu
- Lisenziyanın verilməsində
İqtisadiyyat Nazirliyi özəl tibb fəaliyyəti subyektlərinin ərizələrinə baxarkən qanunvericilikdə nəzərdə tutulmuş qaydada rəy alınması üçün Səhiyyə Nazirliyinə müraciət edir. Həmin müəssisələrin qiymətləndirilməsi və rəy verilməsi işi Səhiyyə Nazirliyinin Analitik Ekspertiza Mərkəzi tərəfindən İqtisadiyyat Nazirliyinin müvafiq nümayəndələrinin iştirakı ilə həyata keçirilir. Tərtib edilmiş rəy Səhiyyə Nazirliyi tərəfindən İqtisadiyyat Nazirliyinə təqdim edilir.
- Nəzarətdə
Lisenziya almış özəl tibb fəaliyyəti subyektlərinin göstərdikləri tibbi xidmətlərin keyfiyyətinə nəzarət Səhiyyə Nazirliyi tərəfindən həyata keçirilir. Bu məqsədlə müvafiq normativ sənədlərin tələblərinə uyğun olaraq, planlı və plandankənar yoxlamalar təşkil edilir.
Planlı yoxlamaların 1 il öncədən tərtib edilmiş siyahısı Sahibkarlıq sahəsində aparılan yoxlamaların vahid məlumat reyestrinə daxil edilir və reyestrdə həmin yoxlamalar təsdiq edildikdən sonra icra edilir.
Plandankənar yoxlamalar isə vətəndaşların şikayətləri, aidiyyəti dövlət qurumlarının müraciətləri, kütləvi informasiya vasitələrindəki qanunazidd reklam məlumatları əsasında yoxlamaların vahid məlumat reyestrinə daxil edildikdən sonra aparılır.
Özəl tibb fəaliyyəti subyektlərinə münasibətdə Səhiyyə Nazirliyinin Analitik Ekspertiza Mərkəzi tərəfindən İnzibati xətalar məcəlləsinin hansı maddələri üzrə protokol tərtib edilə bilər
Maddə 210. Lisenziya olmadan özəl tibbi fəaliyyətlə və ya əczaçılıqla məşğul olma
210.1. Lisenziya olmadan özəl tibbi fəaliyyətlə və ya əczaçılıqla məşğul olmağa görə-
fiziki şəxslər iki min manatdan üç min manatadək məbləğdə,
vəzifəli şəxslər beş min manatdan on min manatadək məbləğdə,
hüquqi şəxslər iyirmi min manatdan otuz min manatadək məbləğdə cərimə edilir.
Maddə 215. Sağlamlığın qorunması sahəsində vətəndaşların hüquqlarının pozulması
215.1. Tibb fəaliyyəti ilə məşğul olan şəxslər tərəfindən dövlət tibb müəssisələrinin nizamnamələrində və ya özəl tibb fəaliyyəti sahəsində onlara verilmiş lisenziyada göstərilən işlərdən və xidmətlərdən kənar tibb fəaliyyətinin həyata keçirilməsinə görə –
fiziki şəxslər üç yüz manatdan beş yüz manatadək məbləğdə,
vəzifəli şəxslər səkkiz yüz manatdan min manatadək məbləğdə,
hüquqi şəxslər altı min manatdan səkkiz min manatadək məbləğdə cərimə edilir.
215.4. Qanunvericiliyə uyğun olaraq sertifikasiyadan keçməyən şəxslərin (işçilərin) praktik tibb və əczaçılıq fəaliyyətinə buraxılmasına görə —
vəzifəli şəxslər səkkiz yüz manatdan min manatadək məbləğdə,
hüquqi şəxslər altı min manatdan səkkiz min manatadək məbləğdə cərimə edilir.
Maddə 602. Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında qanunvericiliyin pozulması
602.4. Sahibkar tərəfindən yoxlama prosesində yoxlamaya aid sənədlərin yoxlayıcıya təqdim edilməməsinə, yoxlama zamanı yaranan suallara şifahi və (və ya) yazılı izahatlar verilməməsinə, təhrif olunmuş, yanlış məlumatın verilməsinə və ya sahibkarlıq fəaliyyəti üçün istifadə olunan əraziyə, istehsal və emal müəssisələrinə, anbarlara, satış sahələrinə, nəqliyyat vasitələrinə, habelə sahibkarlıq fəaliyyəti üçün istifadə olunan digər yerlərə baxış keçirilməsinə mane olmağa görə –
vəzifəli şəxslər min manatdan min beş yüz manatadək məbləğdə cərimə edilir.
Cəriməni hara ödəməli?
Özəl tibb fəaliyyəti subyektlərinə İnzibati Xətalar Məcəlləsinin yuxarıda qeyd edilən maddələri üzrə protokol yazıldıqda və son nəticədə cərimə olunması qərarı çıxarıldıqda, cərimə aşağıdakı bank rekvizitləri üzrə ödənilməlidir:
Bank rekvizitləri
Alan bank Dövlət Xəzinədarlığı Agentliyi
Kodu 210005
VÖEN 1401555071
Müxbir hesab № AZ41NABZ01360100000000003944
S.W.I.F.T. CTREAZ22
Alan müştəri AR Səhiyyə Nazirliyi
Hesab № AZ55CTRE00000000002127602
VÖEN 1400049171
Büdcə təsnifat kodu 143300
Büdcə səviyyə kodu 7
Özəl tibb fəaliyyəti ilə bağlı suallarınızı aşağıdakı əlaqə məlumatlarından istifadə etməklə Analitik Ekspertiza Mərkəzinin Tibbi nəzarət şöbəsinə yönləndirə bilərsiniz.
Əlaqə məlumatları:
| Telefon: | +99412 596 05 20
(daxili: 211, 206, 205, 204) |
| Mobil: | +99450 246 93 70
+99450 272 80 58 |
| E-mail: | [email protected] |
| Web: | www.pharma.az |
| Ünvan: | AZ1065, Bakı, Yasamal rayonu, C.Cabbarlı küçəsi 34 |
