“Dərman vasitələri haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının 14 iyul 2023-cü il tarixli Qanununun qüvvəyə minməsi ilə dərman və tibb vasitələri ilə davranışın hüquqi və təşkilati əsaslarında dəyişikliklər edilib. Sözügedən dəyişikliklər həmçinin Bioloji fəallığa malik qida əlavələrinə də aid olunduğuna görə, həmin dəyişikliklərlə bağlı tələblər 2024-cü il, 1 yanvar tarixindən etibarən tətbiq olunacaqdır. Həmin dəyişiklikləri diqqətinizə çatdırırıq:
- Reklamda bioloji fəallığa malik qida əlavəsinin adı səsləndirildikdən dərhal sonra onun dərman vasitəsi olmadığı deyilməli, həmçinin bioloji fəallığa malik qida əlavəsinin əmtəə nişanı adı ilə eyni fonda, ölçüdə və şriftdə olan aydın, seçilən “DƏRMAN VASİTƏSİ DEYİLDİR” sözləri görünməlidir;
- Bioloji fəallığa malik qida əlavəsinin və dövlət qeydiyyatına alınmış dərman vasitəsinin adlarında ən azı 4 (dörd) hərf fərqi olmalıdır. Bioloji fəallığa malik qida əlavəsinin tərkibində olmayan maddə onun adında istifadə edilə bilməz;
- Bioloji fəallığa malik qida əlavələrinin üzərində və onların istifadəsi təlimatlarında (içlik vərəqlərində) əmtəə nişanı adının yazıldığı hər yerdə əmtəə nişanı adının altında onunla eyni ölçüdə və şriftdə olan ağ fonda qara rəngli aydın, seçilən, qalın və böyük hərflərlə, silinməsi mümkün olmayan tərzdə çap olunmuş “DƏRMAN VASİTƏSİ DEYİLDİR!” sözləri yazılmalıdır (dərman vasitəsi deyildir sözləri – DƏRMAN VASİTƏSİ DEYİLDİR! sözləri ilə əvəz edilməlidir.
- Aptek təşkilatlarında bioloji fəallığa malik qida əlavələri onlar üçün ayrılmış rəf və dolablarda dərman vasitələrindən ayrı saxlanılmalıdır. Həmin rəf və dolabların ön tərəfinin yuxarı orta hissəsində rəfin və dolabın eninin 60 faizindən az olmayan hissəsini əhatə edən və ən azı “Arial 75” şriftində olan ağ fonda qara rəngli aydın, seçilən, qalın və böyük hərflərlə birinci sətirdə “BİOLOJİ FƏALLIĞA MALİK QİDA ƏLAVƏLƏRİ” sözləri və onun altında “DƏRMAN VASİTƏSİ DEYİLDİR” sözləri yazılmalıdır.
Qeyd edək ki, “Dərman vasitəsi haqqında” Qanunda edilən dəyişikliklər, Səhiyyə Nazirliyinin “Analitik Ekspertiza Mərkəzi” publik hüquqi şəxsinin fəaliyyət istiqamətlərinə birbaşa təsir etdiyi üçün farmakologiya və əczaçılıq sahəsində fəaliyyət göstərən beynəlxalq şirkətlərin nümayəndələri ilə yanaşı, Mərkəzin Hüquq şöbəsinin əməkdaşları tərəfindən müvafiq şöbələrin əməkdaşlarına da, fəaliyyət sahələrindəki dəyişikliklərə dair təqdimatlar hazırlanaraq maarifləndirici təlimlər keçirilib.
