8 noyabr-Azərbaycan dövlətinin müasir tarixinin ən mühüm və yaddaqalan tarixlərindən biridir. Bu əlamətdar gün – Zəfər Günü xalqımızın tarixinə milli birliyin, sarsılmaz iradənin, cəsarətin, qəhrəmanlığın və Vətənə sonsuz sədaqətin rəmzi kimi əbədi həkk olunmuşdur. Bu münasibətlə Səhiyyə Nazirliyi Analitik Ekspertiza Mərkəzinin akt zalında tədbir keçirilmişdir.
Tədbirdə 2020-ci il noyabrın 8-də 44 günlük Vətən müharibəsi zamanı Azərbaycan Silahlı Qüvvələrinin xalqımız üçün xüsusi tarixi, mədəni və mənəvi əhəmiyyətə malik olan Qarabağın incisi Şuşa şəhərini azad etməsindən danışıldı və xüsusi olaraq qeyd edildi ki, Şuşanın azad olunması müharibənin həlledici hadisəsinə və tarixi zəfərimizin rəmzinə çevrildi.
Bu qələbə uzun illər ərzində həyata keçirilən məqsədyönlü dövlət siyasətinin, ölkənin müdafiə qüdrətinin möhkəmləndirilməsinin, xalq-dövlət birliyinin, eləcə də hərbçilərimizin yüksək peşəkarlığının, fədakarlığının və qəhrəmanlığının nəticəsi oldu. Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi ilə tarixi zəfər qazanılmış, ölkəmizin ərazi bütövlüyü bərpa edilmiş və Azərbaycanın tarixində yeni bir səhifə açılmışdır.
Lakin hər bir tarixi qələbənin arxasında insanların taleyi, onların cəsarəti, fədakarlığı və vətənin azadlığı, gələcəyi naminə ən əziz nemətlərindən belə keçməyə hazır olmaları dayanır.
Bu gün biz Azərbaycanın müstəqilliyi, suverenliyi və ərazi bütövlüyü uğrunda canlarından keçmiş şəhidlərimizi dərin hüzn və sonsuz minnətdarlıq hissi ilə yad edirik. Onların adları xalqımızın yaddaşında əbədi yaşayacaq, göstərdikləri qəhrəmanlıq isə gələcək nəsillər üçün əsl vətənpərvərlik nümunəsi olacaqdır.
Müharibə veteranlarına, hərbi qulluqçulara, eləcə də şəhid ailələrinə dərin hörmət və ehtiramımızı bildiririk. Onların dözümü, mənəvi gücü və vətənə sədaqəti ən yüksək qiymətə layiqdir.
Zəfər Günü yalnız keçmiş hadisələrin xatırlanması demək deyil. Bu gün, ilk növbədə, gələcək nəsillər qarşısında məsuliyyətimizi ifadə edir. Müstəqilliyimizin qorunması, dövlətçiliyimizin möhkəmləndirilməsi, ölkəmizin inkişafı, milli dəyərlərimizin mühafizəsi və sülh şəraitində gələcəyimizin təmin edilməsi hər birimizin üzərinə düşən mühüm vəzifədir.
Bu gün Azərbaycan qarşısında azad edilmiş ərazilərin bərpası, vətəndaşlarımızın doğma yurd-yuvalarına qayıdışının təmin edilməsi, şəhər və kəndlərin dirçəldilməsi, infrastrukturun, təhsilin, səhiyyənin və iqtisadiyyatın inkişaf etdirilməsi kimi mühüm vəzifələr dayanır.
Gənc nəsildə vətəndaş məsuliyyəti hissinin, öz ölkəsinin tarixinə hörmətin və qazandığımız zəfərin hansı yüksək bədəllə əldə olunduğunun dərk edilməsinin formalaşdırılması xüsusi əhəmiyyət kəsb edir.
Hər birimiz tutduğumuz vəzifədən və fəaliyyət sahəmizdən asılı olmayaraq, vicdanlı əməyimiz, peşəkarlığımız və vəzifə öhdəliklərimizə məsuliyyətli münasibətimizlə Azərbaycan dövlətinin möhkəmlənməsinə və inkişafına öz töhfəmizi verməliyik.
Analitik Ekspertiza Mərkəzinin kollektivi Azərbaycan xalqını bu uca bayram münasibətilə təbrik edir. Qoy qələbəmiz yalnız hərbi şücaətin rəmzi deyil, həm də ölkəmizin gələcək inkişafının, tərəqqisinin, sabitliyinin və rifahının möhkəm təməli olsun.
Qoy Azərbaycanda daim sülh, sabitlik və əmin-amanlıq hökm sürsün. Ölkəmiz inkişaf edərək daha da qüdrətlənsin və gələcək nəsillər müstəqil, güclü dövlətin səmasında daim sülh şəraitində yaşasınlar.
Şəhidlərimizin əziz xatirəsi daim qəlbimizdə yaşayacaqdır!
Bizə bu zəfəri bəxş edən qəhrəmanlarımız qarşısında baş əyirik!
Yaşasın Azərbaycan!
Yaşasın müstəqil, güclü və qalib Azərbaycan!
