19.06.2026-cı il tarixində Səhiyyə Nazirliyi və Dövlət Gömrük Komitəsinin rəhbərlərinin sədrliyi ilə qurumlar arasında dərman və tibb vasitələrinə nəzarət sahəsində əməkdaşlığın gücləndirilməsi məqsədilə görüş keçirilmişdir. Görüşdə əsasən aşağıdakı məsələlər üzrə razılığa gəlinmişdir:
- DGK və SN arasında qarşılıqlı əməkdaşlığın gücləndirilməsi və dərman və tibb vasitələrinə dair verilən icazələrin qarşılıqlı inteqrasiyası məqsədilə qurumların elektron sistemlərinə qarşılıqlı əlçatanlığın təmin edilməsi. Səhiyyə nazirinin tabe qurumlara göstərişinə əsasən, qurumların malik olduqları elektron informasiya sistemlərinə DGK-nın müvafiq struktur bölmələrinin giriş imkanının təmin edilməsi nəzərdə tutulmuşdur.
- Dərman və tibb vasitələrinə münasibətdə yaranmış və yarana biləcək problemlərin aradan qaldırılması məqsədilə mütəxəssislərdən və aidiyyəti şəxslərdən ibarət işçi qrupların yaradılması və bu işçi qrupların qarşılıqlı fəaliyyət göstərməsi nəzərdə tutulmuşdur. Qurumların mütəxəssislərinin müvafiq sahələr üzrə təlim və seminarların keçirilməsi barəsində qarşılıqlı razılıq əldə olunmuşdur.
- DGK və SN öz sahələri üzrə qanunvericiliyə müvafiq dəyişikliklərin edilməsi və ortaq fəaliyyət istiqamətlərinə dair normativ bazanın gücləndirilməsi üçün razılığa gəlinmişdir.
Səhiyyə Nazirliyi Analitik Ekspertiza Mərkəzinin rəhbərliyinin də iştirak etdiyi görüşdə tərəflər qarşıya qoyulmuş məqsədlərə nail olmaq üçün əməkdaşlığın daha da genişləndirilməsi və birgə fəaliyyətin əlaqələndirilməsi istiqamətində işlərin davam etdirilməsi barədə razılığa gəliblər.
