24-28 noyabr 2025-ci il tarixlərində Fransanın Lion şəhərində, ÜST-nın Akademiyasında Əczaçılıq Məhsullarının Keyfiyyətinə Nəzarət üzrə Milli Laboratoriyalar Qlobal Şəbəkəsinə (WHO-GNP, Global Network of National Quality Control Laboratories for Pharmaceuticals) və Bioloji Dərman Vasitələrinin Keyfiyyətinə Nəzarət sahəsində Şəbəkəsinə (WHO-NNB, National Control Laboratory Network for Biologicals) üzv olan ölkələrin Milli Tənzimləyici Qurumların nümayəndələri arasında görüş keçirilmişdir.
Görüşdə, Azərbaycan Respublikasında bu sahədə Milli Tənzimləyici Qurum olan Səhiyyə Nazirliyi Analitik Ekspertiza Mərkəzinin baş direktoru Murad Süleymanov və Mərkəzin Tibb və əczaçılıq vasitələrinin ekspertizası və keyfiyyətinə nəzarət laboratoriyasının müdiri Çingiz Şükürov iştirak etmişdir. Görüşdə laboratoriya müdiri Çingiz Şükürov Analitik Ekspertiza Mərkəzinin fəaliyyəti və Azərbaycanda dərman vasitələrinin keyfiyyətinə nəzarət haqqında təqdimat ilə çıxış etmişdir.
Sözügedən Şəbəkələrə üzv ölkələrin nümayəndələri də bu sahədə təcrübələrinə dair məruzələr təqdim etmişdirlər. Görüş zamanı ÜST mütəxəssisləri tərəfindən dərman vasitələrinin keyfiyyətinə nəzarət sahəsində dünyada mövcud olan yeni yanaşmalar, etibarlı tanınma təcrübəsi haqqında məruzələr dinlənilmişdir.
Dərman vasitələrinin tərkibində qarışıqların təyini, keyfiyyətsiz və falsifikasiya edilmiş dərman vasitələrinə qarşı effektiv və müasir mübarizə üsulları, ÜST-nın prekvalifikasiya edilmiş laboratoriyaları və bu sahədə mövcud prosedurlar barədə məruzələr də maraqla qarşılanmışdır. Xüsusilə, biofarmasevtik dərman vasitəsi seriyalarının satışa buraxılışı zamanı heyvanlar üzərində sınaqların əvəzinə in vitro sınaqlardan istifadə və bu sahədə Avropa Farmakopeyasında mövcud monoqrafiyalar, habelə, bir çox yeni trendlər haqqında məruzələr tədbir iştirakçılarının diqqətinə çatdırılmışdır.
