13-14 noyabr 2025-ci il tarixlərində Asiya İnkişaf Bankının dəstəyi ilə, Mərkəzi Asiya Regional İqtisadi Əməkdaşlıq təşkilatına üzv ölkələrin əczaçılıq sahəsinə nəzarət edən qurumlarının nümayəndələrinin iştirakı ilə Bakıda tədbir keçirilmişdir. Tədbirdə Özbəkistan, Qazaxıstan, Gürcüstan, Tacikistan və Qırğızıstan Respublikalarının əczaçılıq sahəsinə nəzarət edən milli tənzimləyici qurumlarının nümayəndələri məruzələrlə çıxış etmişdilər.
Sözügedən tədbirdə həmsədr olaraq, Azərbaycan Respublikası Səhiyyə Nazirliyi Analitik Ekspertiza Mərkəzinin baş direktorunun müavini Rafiq Xudayev, əlaqələndirici şəxs olaraq, Tibb və əczaçılıq vasitələrinin ekspertizası və keyfiyyətinə nəzarət laboratoriyasının müdiri Çingiz Şükürov, iştirakçı qismində Dərman vasitələrinin idxal-ixrac şöbəsinin müdiri Kamran Quliyev, Dərman vasitələrinin qeydiyyat-ekspertiza şöbəsinin müdiri Azər Həsənov, Dərman vasitələrinin təqib və izləmə şöbəsinin müdiri Səid Fərzullayev, Bioloji fəallığa malik qida əlavələrinin ekspertizası şöbəsinin eksperti Aygün Cəfərova və Tibb vasitələrinin qeydiyyat-ekspertiza və idxal şöbəsinin eksperti Vüsalə Məmmədova iştirak etmişdirlər.
Tədbirin keçirilməsində məqsəd Mərkəzi Asiya Ölkələrinin əczaçılıq sahəsində milli tənzimləyici qurumları arasında qarşılıqlı əməkdaşlığın möhkəmləndirilməsi, dərman vasitələrinin qeydiyyatı proseduru, həmçinin, dərman vasitələrinin laborator analizi proseduru zamanı qarşılıqlı tanınmanın tətbiqi ilə tənzimləyici qurumlarda iş yükünün azaldılması olmuşdur.
Tədbirdə iştirak edən ölkələr arasında ortaq maraqların müəyyən edilməsi istiqamətində müzakirələr aparıldı, süni intellektin əczaçılıq sahəsində milli tənzimləyici qurumlar tərəfindən tətbiqi sahəsində məruzələr dinlənildi. Azərbaycan Respublikasında əczaçılıq sahəsində beynəlxalq tanınmaya dair və tənzimləmə sahəsində mövcud olan qanunvericilik aktları və prosedurlar iştirakçıların nəzərinə çatdırıldı. Ölkədə əczaçılıq sahəsində milli tənzimləyici qurum olan Analitik Ekspertiza Mərkəzinin beynəlxalq qurumlar tərəfindən prekvalifikasiya edilməsi üçün Asiya İnkişaf Bankının nümayəndələri ilə müzakirələr aparıldı və təkliflər dinlənildi.
