Ümumdünya Səhiyyə Təşkilatının (ÜST) Uppsala Monitorinq Mərkəzi tərəfindən hər il təşkil olunan dərmanların təhlükəsizliyinə dair beynəlxalq maarifləndirmə kampaniyası — MedSafetyWeek, bu il 3–9 noyabr tarixlərini əhatə edəcək.
Bu il MedSafetyWeek özünün 10 illik yubileyini qeyd edir və bu günə qədər keçirilmiş ən genişmiqyaslı kampaniya olacaq. 117 ölkədən 130-dan çox təşkilat bu təşəbbüsdə iştirak edir və məlumatlar 60-dan çox dildə yayılır.
Azərbaycan Respublikasının Səhiyyə Nazirliyi Analitik Ekspertiza Mərkəzi hər il olduğu kimi, yenə MedSafetyWeek kampaniyasında fəal iştirak edir və bu təşəbbüsü dəstəkləyir.
Bu ilki kampaniya əhalinin və tibb sahəsində çalışanların diqqətini dərman vasitələrinin istifadəsi zamanı yaranan əlavə təsirlər barədə məlumatların vaxtında bildirilməsinin vacibliyinə yönəldilmişdir. MedSafetyWeek çərçivəsində dünyanın müxtəlif ölkələrində dərman vasitələrinin tənzimləyici qurumların sosial şəbəkələrində məlumatlandırıcı təbliğat tədbirləri həyata keçirilir. Bununla da pasiyentlərin, onların ailələrinin və tibb işçilərinin dərman vasitələrinin təhlükəsiz istifadəsində oynadığı mühüm rol bir daha vurğulanır.
Yubiley kampaniyasının əsas şüarı belədir: “Şübhəli əlavə təsirlər barədə məlumat verməklə biz dərman vasitələrini hər kəs üçün daha təhlükəsiz edə bilərik”.
Kampaniyaya Ümumdünya Səhiyyə Təşkilatı (ÜST), Dərman Vasitələrinin Tənzimləyici Orqanlarının Beynəlxalq Koalisiyası (ICMRA), həmçinin dərmanların təhlükəsiz istifadəsində maraqlı olan bir sıra milli və beynəlxalq qurumlar dəstək göstərir.
