Azərbaycan Respublikasının Prezidentinin 2022-ci il 22 iyul tarixli Sərəncamı ilə təsdiq edilmiş “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın aidiyyəti bəndlərinin icrasını, həmçinin tibb müəssisələrinin təşkili və idarə olunması, müasir tələblərə uyğun inkişafının təmin edilməsi, iqtisadi və təşkilati cəhətdən səmərəli idarəetmə üsullarının tətbiqi, maliyyə və kadr resurslarının strateji idarə olunması və tibbi xidmətlərin keyfiyyətinin artırılması məqsədi ilə Səhiyyə Nazirliyi Analitik Ekspertiza Mərkəzi özəl tibb fəaliyyəti subyektləri üçün silsilə təlimlər keçirilir. Təlimlər tibb müəssisələrinin rəhbərləri, baş həkimlər, menecerlər, kadr üzrə məsul işçilər, həkimlər, sanitariya-epidemioloji vəziyyətə məsul şəxslər, marketinq üzrə mütəxəssislər, səhiyyə sektorunda çalışan və sözügedən təlimlərə maraq göstərən digər şəxslər üçün nəzərdə tutulub.
Keçirilməsi 2023-2024-cü il müddətində nəzərdə tutulmuş təlimlər Analitik Ekspertiza Mərkəzində təşkil olunacaq. Səhiyyə Nazirliyinin dəstəyi ilə Mərkəzin Tibbi nəzarət şöbəsinin əməkdaşları ilə yanaşı, təlimlərdə digər qurumların məsul şəxsləri də məruzəçi qismində cəlb olunub.
İlk təlim 29 sentyabr 2023-cü il tarixində baş tutub. Tədbir zamanı müxtəlif özəl tibb müəssisələrindən iştirak etmiş mütəxəssislər üçün “Tibb müəssisələrində Kadr resurslarının idarə edilməsi, kadr strategiyasının qurulması”, “Səhiyyə sistemi və səhiyyənin təşkili: Səhiyyə siyasəti, əsas anlayışlar və beynəlxalq təcrübə” kimi mövzularda təqdimatlar edilib, verilən suallar cavablandırılıb.
Təlim mövzularının aktuallığını, müasir dövrdə səhiyyənin inkişafını və tibbi xidmətlərin daha da təkmilləşdirilməsinin zəruriliyini nəzərə alaraq, bu təlimlərin faydalı olacağını qeyd etmək olar.
